ގައިދީންނަށާއި، އޮފިސަރުންނަށް ކޮއްތު ފޯރުކޮށްދޭ ފަރާތްތަކަށް 30 މިލިއަނެއްހާ ރުފިޔާ ނުދެވި އެބަ އޮތް

މޯލްޑިވްސް ކަރެކްޝަނަލް ސާވިސްގެ ބެލުމުގެ ދަށުގައި ތިބޭ ގައިދީންނަށާއި، އޮފިސަރުންނަށް ކޮއްތު ފޯރުކޮށްދޭ ފަރާތްތަކަށް 30 މިލިއަނެއްހާ ރުފިޔާ ނުދެވި އޮތްކަމަށް ޕްރިޒަން ކޯޕަރޭޓިވް ސޮސައިޓީން ހާމަކޮށްފިއެވެ.

މި މައްސަލަ ހާމަވެގެން ދިޔައީ މިއަދު ރައްޔިތުންގެ މަޖިލީހުގެ މާލިއްޔަތު ކޮމިޓީން ޕްރިޒަން ކޯޕަރޭޓިވް ސޮސައިޓީގެ ވެރިންނާއެކު ބޭއްވި ބައްދަލުވުމުގައެވެ. މި ބައްދަލުވުމުގައި ދެފަރާތުން ވަނީ އެކި ކަންބޮޑުވުންތައް ފާޅުކޮށްފައެވެ. އެގޮތުން މާލިއްޔަތު ކޮމިޓީން ވަނީ ޕްރިޒަން ކޯޕަރޭޓިވް ސޮސައިޓީގެ މާލީ ހިސާބުތައް ދިނުން ލަސްވަމުންދާ މައްސަލައާމެދު ކަންބޮޑުވުން ފާޅުކޮށްފައެވެ.

ބައްދަލުވުމުގައި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވި ގޮތުގައި، ކަރެކްޝަނަލް ސާވިސްއާ މުއާމަލާތްކުރެވޭތާ ދުވަސްތަކެއް ވެގެން ގޮސްފައިވީ ނަމަވެސް، މާލިއްޔަތު ކޮމިޓީން ބޭނުންވާ ސުވާލުތަކަށް އެ އިދާރާއިން ޖަވާބު ދެއްވާފައި ނުވެއެވެ. އަދި ޕްރިޒަން ކޯޕަރޭޓިވް ސޮސައިޓީގެ މާލީ ހިސާބުތައް އޮޑިޓްކޮށް ކަމާބެހޭ ފަރާތްތަކާ ހިއްސާކުރާކަމަށް ބުނާއިރު، އެ ހިސާބުތައް މަޖިލީހާ ހިއްސާކޮށްފައި ނުވާކަން ފާހަގަކުރެއްވިއެވެ.

މާލިއްޔަތު ކޮމިޓީ---.. ފޮޓޯ: މަޖިލިސް

ޕްރިޒަން ކޯޕަރޭޓިވް ސޮސައިޓީގެ ފަރާތުން ބައްދަލުވުމުގައި ފާހަގަކުރި ގޮތުގައި، ޖަލުގެ ގައިދީންނަށް ފަސް އިރު ކާންދިނުމަށް 9 މެނޫއެއް ހިމެނެއެވެ. އަދި މިއީ އޭގެ ޒާތުގައި ވަރަށް ބޮޑު ތަކުލީފުތަކެއް އުފުލަންޖެހޭ ކަމެކެވެ. އެންމެ ބޮޑު ގޮންޖެހުމަކީ ޖަލުތަކަށް ގަޑިއަށް ކާތަކެތި ގެނައުމާއި، ދީފައިވާ މެނޫއާ އެއްގޮތަށް ކާއެއްޗެހި ނުގެނެވުމެވެ. މި މައްސަލަ ދިމާވަމުން އަންނަނީ ފިނޭންސުން އެފަރާތްތަކަށް ދޭންޖެހޭ ފައިސާ ނުދޭތީކަމަށް ވެސް ފާހަގަކުރިއެވެ.

މިހާރު ގައިދީންގެ ކެއިން ބުއިމުގެ ޚަރަދަށް ދުވާލެއްގެ މައްޗަށް ބޮލަކަށް 75 ރުފިޔާ ހޭދަކުރެވެއެވެ. މިއީ މަހަކަށް 2,250 ރުފިޔާއެވެ. ޖަލު ގައިދީންގެ ތެރެއިން ހަކުރު ބަލީގެ މީހުންނަށް ދެނީ ވަކި ޚާއްސަ މެނޫއެކެވެ. ކޯޕަރޭޓިވް ސޮސައިޓީން ވަނީ ޓެންޑަރ އުސޫލުން ކޮއްތު ފޯރުކޮށްދޭ ފަރާތްތައް ހަމަޖެއްސުމުގެ ބަދަލުގައި ކޯޕަރޭޓިވް ސޮސައިޓީން އެ މަސައްކަތްކުރުމުން މިކަމުގައި އުފުލަންޖެހޭ ތަކުލީފްތައް ކުޑަވާނެކަމަށް ފާހަގަކޮށްފައެވެ.