ދިގުރަށު ސިއްޙީ މަރުކަޒުގެ ޚިދުމަތް 24 ގަޑިއިރަށް ބަދަލު ކުރައްވާ، ލޯކަލް ޓޫރިޒަމް އިތުރަށް ފުޅާ ކުރުމަށް އެހީތެރިވުމުގެ ގޮތުން ކޮންވެންޝަން ސެންޓަރެއް ޤާއިމު ކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. މިކަން އެމަނިކުފާނު ހާމަކުރެއްވީ ދިގުރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.
ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ސަރުކާރުން ދިގުރަށުގައި ހިންގާ މަގު ހެދުމުގެ މަޝްރޫޢާއި ސްކޫލުގެ އައު އިމާރާތަކީ ރަށުގެ ތަރައްޤީއާއި ކުރިއެރުމަށް ނުހަނު މުހިންމު ދެ މަޝްރޫޢު ކަމަށެވެ. "މި ދެ މަޝްރޫޢުވެސް ރައްޔިތުން އެންމެ އެދޭގޮތަށް ގެންގޮސްދެއްވާނެކަމުގެ ޔަޤީންކަން އަޅުގަނޑު ރައްޔިތުންނަށް އަރުވަން،" ރައީސް ވިދާޅުވިއެވެ.
އަންނަ އަހަރުގެ ތަރައްޤީގެ މަޝްރޫޢުތަކުގެ ތެރޭގައި، ރަށުން ބޭރުން ޚިދުމަތްކުރާ މުވައްޒަފުންނަށް އެކަމަޑޭޝަން ބްލޮކެއް ޤާއިމުކުރެއްވުމާއި، ފުޓުބޯޅަ ދަނޑެއް ތަރައްޤީކުރެއްވުން ހިމެނެއެވެ. އަދި ޓޫރިޒަމް ދާއިރާ އިތުރަށް ފުޅާކުރުމަށްޓަކައި ކޮންވެންޝަން ސެންޓަރެއް ޤާއިމުކުރައްވާނެކަމަށާއި، އަންނަ އަހަރުގެ ކުރީކޮޅު ޑޮލަރު އޭޓީއެމްއެއްވެސް ބެހެއްޓޭނެކަމަށް ރައީސް ވިދާޅުވިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.