އިސްލާމީ ކަންތައްތަކާ ބެހޭ ވުޒާރާއާއި މައުމޫން ފައުންޑޭޝަނާ ދެމެދު ގުޅިގެން މަސައްކަތް ކުރުމަށްޓަކައި މިއަދު ފަހުމުނާމާއެއްގައި ސޮއިކޮށްފިއެވެ. މި އެއްބަސްވުމުގެ މަގުސަދަކީ ދީނީ ކަންކަމުގައި ދެ ފަރާތް ގުޅިގެން މަސައްކަތް ކުރުމެވެ. މި ފަހުމުނާމާގައި އިސްލާމީ ކަންތައްތަކާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު ޑރ. މުޙައްމަދު ޝަހީމް އަލީ ސަޢީދު އެވެ. އަދި މައުމޫން ފައުންޑޭޝަންގެ ފަރާތުން ސޮއިކުރެއްވީ އެ ފައުންޑޭޝަންގެ ޗެއަރމަން ކުރީގެ ރައީސް އަލްއުސްތާޛް މައުމޫން ޢަބްދުލްޤައްޔޫމް އެވެ. މި ފަހުމުނާމާއަކީ އިސްލާމީ ކަންތައްތަކާ ބެހޭ ވުޒާރާއާއި މައުމޫން ފައުންޑޭޝަން ގުޅިގެން ކުރިއަށް އޮތް ތަނުގައި ދީނީ ދާއިރާއިން އެކި މަސައްކަތްތައް ކުރުމަށް އެކުލަވާލެވުނު އޮނިގަނޑެކެވެ. މީގެ ކުރިންވެސް މި ދެ ފަރާތް ގުޅިގެން ރާއްޖޭގައި ދީނީ ހޭލުންތެރިކަން އިތުރުކުރުމަށްޓަކައި ތަފާތު ގިނަ ހަރަކާތްތަކެއް ވަނީ ކާމިޔާބުކަމާއެކު ހިންގާފައެވެ. މި އެއްބަސްވުމުގެ ދަށުން ކުރިއަށް އޮތް ތަނުގައި ދީނީ އިލްމު ފެތުރުމަށާއި، މުޖުތަމައުގެ ދީނީ ހޭލުންތެރިކަން އިތުރުކުރުމަށް އިތުރު ޕްރޮގްރާމްތަކެއް ރޭވިގެންދާނެ ކަމަށް ބެލެވެއެވެ.