އަތޮޅު ހޮސްޕިޓަލްތަކަށް ބޭނުންވާ 3 ލޯންޗު ލިބިއްޖެ، ބާކީ 4 ލޯންޗު މި މަހު ލިބޭނެ: ސިއްހީ ވުޒާރާ

އަތޮޅު ހޮސްޕިޓަލްތަކުގައި ބޭނުންކުރުމަށް ހަތް ލޯންޗުގެ ތެރެއިން 3 ލޯންޗެއް މިއަދު ރާއްޖެ ގެނެސްފައިވާ ކަމަށާއި އަނެއް 3 ލޯންޗުވެސް، އޭޝިއަން ޑިވެލޮޕްމަންޓް ބޭންކާއި ގުޅިގެން ކުރިޔަށްގެންދާ، އޭޝިއާ ޕެސިފިކް ވެކްސިން އެކްސެސް ފެސިލިޓީ (އެޕްވެކްސް) ޕްރޮޖެކްޓްގެ ދަށުން ސިއްހީ ވުޒާރާއަށް މި މަހުގެ ތެރޭގައި ލިބޭނެ ކަމަށް މިއަދު ހާމަކޮށްފިއެވެ.

މިއީ ރާއްޖޭގެ ސިއްހީ ދާއިރާގެ ހިދުމަތްތައް އިތުރަށް ހަރުދަނާކޮށް، އަތޮޅު ހޮސްޕިޓަލްތަކުން ދެވޭ ތަފާތު ހިދުމަތްތަކުގެ މަންފާ އެންމެ އެކަށީގެންވާ ގޮތެއްގައި އަތޮޅުގެ ރައްޔިތުންނަށް ލިބިދެވޭނެ އިންތިޒާމްތައް ހަމަޖެއްސުމަށްޓަކައި ސިއްހީ ވުޒާރާއިން ކުރަމުންދާ މަސައްކަތްތަކުގެ ތެރެއިން ހޯދާ އުޅަނދުތަކެކެވެ.

ސިއްހީ ވުޒާރާއިން ބުނީ، މި ލޯންޗްތަކަކީ އަތޮޅު ހޮސްޕިޓަލްތަކުގެ އައުޓްރީޗް ޕްރޮގްރާމްތަކުގެ ތެރެއިން ދެވޭ ޚިދުމަތްތައް އެހެނިހެން ރަށްރަށް ފޯރުކޮށްދިނުމުގެ މަގުފަހިކޮށްދިނުމަށާއި، ވެކްސިން ރަށްތަކަށް ފަސޭހައިން ފޯރުކޮށްދެވޭނެ އިންތިޒާމް ހަމަޖެއްސުމަށް ބޭނުންކުރާނެ އުޅަނދުތަކެއް ކަމަށެވެ. މީގެ އިތުރުން ލެބޯޓްރީގެ ހިދުމަތް ނެތް ރަށްރަށުން ސުންކު ނަގައިގެން، އެ ހިދުމަތް ލިބޭ ރަށްރަށަށް ގެންދިއުމަށްވެސް މި ލޯންޗުތައް ބޭނުން ކުރެވޭނެއެވެ.

މީގެ އިތުރުން މި އުޅަނދުތައް ތައްޔާރު ކުރެވިފައިވަނީ އެމަޖެންސީ ހާލަތްތަކުގައި ބަލިމީހުން އުފުލަންޖެހިއްޖެ ހާލަތެއްގައި އެކަމަށް ބޭނުންކުރެވޭނެފަދަ ގޮތަކަށް ކަމަށްވެސް ސިއްހީ ވުޒާރާއިން ވިދާޅުވެއެވެ.

މި ޕްރޮޖެކްޓްގެ ދަށުން ގެންނަށް ހަމަޖެހިފައިވާ ހަތް ލޯންޗްގެ ތެރެއިން ތިން ލޯންޗެއް މިހާރު ވަނީ މާލެ ގެނެވިފައެވެ. އަދި ބާކީ ލޯންޗްތައް މިއަހަރުގެ ޖެނުއަރީމަހުގެ ނިޔަލަށް ރާއްޖެ ގެނައުމަށް ވަނީ ހަމަޖެހިފައެވެ. އެޕްވެކްސް ޕްރޮޖެކްޓްގެ ދަށުން ގެނެވޭ ލޯންތަކާއެކު، ހުރިހާ އަތޮޅު ހޮސްޕިޓަލްތަކަށް ލޯންޗްތައް ފޯރުކޮށްދެވިގެންދާނެ ކަމަށްވެސް އެ ވުޒާރާއިން ވިދާޅުވިއެވެ.

މި އުޅަނދުތަކާއެކު އަތޮޅު ހޮސްޕިޓަލްތަކުން ދެވޭ އެކި ހިދުމަތްތައް އަވަސްކަމާއެކު އަތޮޅުގެ ރަށްތަކަށް ލިބޭނެ އިންތިޒާމް ހަމަޖެހި، ހާއްސަ ދާއިރާތަކުގެ ޑޮކްޓަރުން އައުޓްރީޗް ޕްރޮގްރާމްތަކުގެ ދަށުން ރަށްތަކުގައި ބަލިމީހުން ބެލުމުގެ އިންތިޒާމްތައް އިތުރަށް ފަސޭހަވެގެންދާނެ ކަމަށް ބެލެވެއެވެ.