މާލޭގެ ރަސްފަންނު ސަރަހައްދު މަރާމާތު ކުރުމުގެ މަސައްކަތް މިނިސްޓްރީ އޮފް ކޮންސްޓްރަކްޝަން، ހައުސިން އެންޑް އިންފްރާސްޓްރަކްޗާއިން ފަށައިފިއެވެ. މި މަސައްކަތް ފެށުމާއެކު، އެ ސަރަހައްދުގެ ބައެއް ބައިތައް މިހާރު ވަނީ އާންމުންނަށް ބަންދުކޮށްފައެވެ. ހައުސިން މިނިސްޓްރީން މިއަދު ވިދާޅުވީ، ރަސްފަންނު މަރާމާތުކުރުމުގެ މަސައްކަތް މިއަދުން ފެށިގެން ކުރިއަށް ގެންދިއުމަށް ހަމަޖެހިފައިވާ ކަމަށެވެ. އަދި މި މަސައްކަތް ކުރިއަށްދާ މުއްދަތުގައި، މަސައްކަތް ހިނގާ ސަރަހައްދުތައް ވަގުތީގޮތުން ބަންދުކުރަމުންދާނެ ކަމަށްވެސް އެ މިނިސްޓްރީން މައުލޫމާތު ދެއްވައެވެ. ރަސްފަންނު ސަރަހައްދަކީ 2016 ވަނަ އަހަރު ހުޅުވި ސަރަހައްދެކެވެ. އެ ސަރަހައްދު ފުރަތަމަ ތަރައްގީ ކުރެވުނު އިރު ހައުސިން މިނިސްޓަރުގެ މަގާމުގައި ހުންނެވީ މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއެވެ. ނަމަވެސް، ވޭތުވެދިޔަ ސަރުކާރުގެ ދައުރުގައި އެ ސަރަހައްދު އެކަށީގެންވާ ގޮތެއްގައި ބަލަހައްޓާފައި ނުވާކަން މިނިސްޓްރީން ފާހަގަކުރެއެވެ. މި މަރާމާތުގެ މަސައްކަތް ނިމުމުން، ރަސްފަންނަކީ ގިނަ ބަޔަކު ބޭނުންކުރާ ސަރަހައްދަކަށްވުމާއެކު، އެތަން ބޭނުންކުރާ ފަރާތްތަކަށް އިތުރަށް ހިތްފަސޭހަ މާހައުލެއް ގާއިމްވެގެންދާނެއެވެ. މީގެ އިތުރުން، އެ ސަރަހައްދުގައި ބޭނުންވާ މުހިންމު ވަސީލަތްތައް ވެސް މި މަސައްކަތުގެ ތެރެއިން ފުރިހަމަ ކުރެވިގެންދާނެ ކަމަށް ބެލެވެއެވެ.