ފީފާ ވޯލްޑް ކަޕް ގްރޫޕް 'އެލް' ގައި ރޭ ކުޅުނު ފުރަތަމަ މެޗުން ޕެނަމާ އަތުން 1-0 އިން ގާނާ މޮޅުވެއްޖެއެވެ. މިއީ 2010 ވަނަ އަހަރުގެ ފަހުން ވޯލްޑް ކަޕެއްގެ ފުރަތަމަ މެޗުން ގާނާ މޮޅުވި ފުރަތަމަ ފަހަރެވެ.
ޓޮރޮންޓޯ ސްޓޭޑިއަމްގައި ކުޅުނު މި މެޗުގެ ހަމައެކަނި ލަނޑު، މެޗުގެ އިތުރު ވަގުތުގެ ފަހު މިނެޓުގައި (95 ވަނަ މިނެޓުގައި) ކާމިޔާބުކޮށްދިނީ ކޭލެބް ޔިރެންކީއެވެ. ބްރެންޑަން ތޯމަސް-އަސާންޓޭ ތަނަވަސްކޮށްދިން ފުރުސަތަކުން ޔިރެންކީ މި ލަނޑު ޖެހީ ޕެނަމާގެ ގޯލް ކުރިމަތީގައި ހުރެއެވެ.
މެޗުގެ ކުރީކޮޅު ޕެނަމާއިން ވަނީ ގާނާގެ ގޯލަށް ނުރައްކާކޮށްފައެވެ. އެގޮތުން މެޗުގެ ދެވަނަ މިނެޓުގައި އާމިރު މުރީލޯ ނަގައިދިން ހުރަހަކުން ސެސީލިއޯ ވަޓަރމަން ފޮނުވާލި ބޯޅަ، ގާނާގެ ކީޕަރު ލޯރެންސް އާޓީ ޒިގީ ވަނީ ހުށިޔާރުކަމާއެކު ދިފާއުކޮށްފައެވެ. ފުރަތަމަ ހާފުގައި ގާނާއަށް ޕެނަމާގެ ގޯލާ އަމާޒުކޮށް އެއްވެސް ހަމަލާއެއް ފޮނުވާލެވިފައެއް ނުވެއެވެ.
ދެވަނަ ހާފު ފެށިގެން 48 ވަނަ މިނެޓުގައި ޖޯނަސް އަޖެޓޭ ބޮލުން ފޮނުވާލި ހަމަލާއަކީ ގާނާއިން ޕެނަމާގެ ކީޕަރު އޯލަންޑޯ މޮސްކޭރާ އިމްތިހާނުކޮށްލި ފުރަތަމަ ފަހަރެވެ. އޭގެ ފަހުން ޕެނަމާގެ ކްރިސްޓިއަން މާޓީނޭޒް ފޮނުވާލި ބޯޅައެއް ގޯލުގެ އަރިމަތީ ދާގަނޑަށް އަމާޒުވިއިރު، ގާނާގެ ޖޯޑަން އަޔޫއަށް ލިބުނު ފުރުސަތެއް ޕެނަމާގެ ޑިފެންޑަރު ރާމޯސް ވަނީ ހުއްޓުވާފައެވެ.
މެޗު އެއްވަރުވާން ދަނިކޮށް، ގާނާއިން އުފެއްދި ހަލުވި ކައުންޓަރ އެޓޭކެއްގައި އެންޓޮއިން ސެމެންޔޯ ދިން ބޯޅައެއް ހިފައިގެން އޭރިއާ ތެރެއަށް ވަދެ، ތޯމަސް-އަސާންޓޭ ހުރަސްކޮށްލި ބޯޅަ ޔިރެންކީ ގޯލުގެ ތެރެއަށް ފޮނުވާލުމާއެކު ގާނާގެ ސަޕޯޓަރުން ވަނީ ވަރަށް ބޮޑަށް އުފާފާޅުކޮށްފައެވެ.
ތަފާސްހިސާބުތަކަށް ބަލާއިރު، މިއީ 2010 ވަނަ އަހަރު ސާބިއާ އަތުން 1-0 އިން މޮޅުވި ފަހުން ވޯލްޑް ކަޕެއްގެ ފުރަތަމަ މެޗުން ގާނާ މޮޅުވި ފުރަތަމަ ފަހަރެވެ. 2010 ގައި ގާނާ ކުއާޓާ ފައިނަލާ ހަމައަށް ދިޔަ ނަމަވެސް، 2014 ގައި އެމެރިކާ އަތުން ބަލިވެ ގްރޫޕް ސްޓޭޖުން ކެޓިއެވެ. އަދި 2018 ގެ މުބާރާތަށް ކޮލިފައި ނުވާއިރު، 2022 ވަނަ އަހަރު ޕޯޗުގަލް އަތުން ބަލިވެ ގްރޫޕުގެ ފުލަށް ގޮސްގެން މުބާރާތުން ވަނީ ކަޓާފައެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.