ޑޮލަރުގެ ދަތިކަން ހައްލުކުރުމަށް ބޭންކުތަކަށް ދޫކުރާ މިންވަރު އެމްއެމްއޭއިން އިތުރުކޮށްފި

ފަތުރުވެރިކަމުގެ އޮފް-ސީޒަނާ ދިމާކޮށް ބާޒާރުގައި ޑޮލަރު ލިބުން ދަތިވުމުގެ މައްސަލައަށް ހައްލެއް ހޯދައިދިނުމުގެ ގޮތުން، ބޭންކުތަކަށް ދޫކުރާ ބޭރު ފައިސާގެ މިންވަރު 25 އިންސައްތަ އިތުރުކުރުމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ނިންމައިފިއެވެ. މި ބަދަލަށް އަމަލުކުރަން ފަށާނީ މި މަހުގެ 28 ވަނަ ދުވަހުން ފެށިގެން ކަމަށް މަރުކަޒީ ބޭންކުން މައުލޫމާތުދެއެވެ.

އެމްއެމްއޭއިން ހާމަކުރި ގޮތުގައި ކުރިއަށް އޮތް ތިން މަސްދުވަހުގެ ތެރޭގައި ކޮންމެ ހަފްތާއަކުވެސް ބޭންކުތަކަށް އިތުރަށް ޑޮލަރު ދޫކުރަމުންދާނެއެވެ. މިއީ ޓޫރިޒަމުން ލިބޭ އާމްދަނީ ދަށްވާ ދުވަސްވަރެއްގައި، ރާއްޖޭން ބޭރަށް ފޮނުވަންޖެހޭ ފައިސާގެ ޑިމާންޑް މަތިވުމުން ދިމާވާ ދަތިތަކަށް ހައްލެއް ހޯދައިދިނުމަށް އެޅި ވަގުތީ ފިޔަވަޅެކެވެ. މީގެ ސަބަބުން ޒަރޫރީ ބޭނުންތަކަށް ބޭނުންވާ ޑޮލަރު ހޯދުމުގައި އާންމުންނަށް ލުއިތަކެއް ލިބިގެންދާނެއެވެ.

ތަފާސްހިސާބުތަކުން ދައްކާގޮތުގައި މިއަހަރުގެ ފުރަތަމަ ފަސް މަސްދުވަހު ބޭންކުތައް މެދުވެރިކޮށް ވިއްކި ބޭރު ފައިސާގެ މިންވަރު ވަނީ މިދިޔަ އަހަރާ އަޅާބަލާއިރު 72 އިންސައްތަ އިތުރުވެފައެވެ. ވަކިން ހާއްސަކޮށް ބޭސްފަރުވާއަށާއި ތައުލީމީ ބޭނުންތަކަށް ބޭރު ފައިސާ ވިއްކި މިންވަރު 78 އިންސައްތަ އިތުރުވެފައިވާކަން އެމްއެމްއޭއިން ފާހަގަކުރެއެވެ.

މީގެ އިތުރުން، ރާއްޖެއަށް ބޭނުންވާ ކާޑުގެ ބާވަތްތަކާއި، ތެލާއި، ބޭސް އަދި ސިއްހީ އާލާތްތައް އެތެރެކުރުމަށް ދޫކުރި ބޭރު ފައިސާގެ އަދަދުވެސް ވަނީ މިދިޔަ އަހަރުގެ ފުރަތަމަ ފަސް މަހާ އަޅާބަލާއިރު 30 އިންސައްތަ އިތުރުވެފައެވެ. މިއީ ރާއްޖޭގެ އިގްތިސާދަށް ބޭނުންވާ މުހިންމު މުދާ އެތެރެކުރުމަށް ބޭރު ފައިސާގެ ބޭނުންތެރިކަން ބޮޑުވެފައިވާ މިންވަރު ހާމަކޮށްދޭ ކަމެކެވެ.

މެދުއިރުމަތީގައި ހިނގަމުންދާ ހަނގުރާމައާ ގުޅިގެން ވޭތުވެދިޔަ ތިން މަސްދުވަހު ރާއްޖެއަށް ޒިޔާރަތްކުރި ފަތުރުވެރިންގެ އަދަދު ވަނީ ދަށްވެފައެވެ. މީގެ ސަބަބުން ޓޫރިޒަމުން ލިބޭ އާމްދަނީއަށް ވަނީ އަސަރުކޮށްފައެވެ. އެމްއެމްއޭއިން ބުނީ ބޭންކުތަކަށް ދޫކުރާ ޑޮލަރު އިތުރުކުރުމުން، އޮފް-ސީޒަންގައި ކުރިމަތިވާ ތާށިކަން ކުޑަވެ، ބޭންކުތަކުން ކަސްޓަމަރުންނަށް ފޯރުކޮށްދޭ ހިދުމަތްތައް ހަރުދަނާވާނެ ކަމަށެވެ.

ވޭތުވެދިޔަ ދެ އަހަރެއްހާ ދުވަހުގެ ތެރޭގައި އެމްއެމްއޭއިން ވަނީ ބޭރު ފައިސާގެ މާކެޓް ހަރުދަނާކުރުމަށް ގިނަ މަސައްކަތްތަކެއް ކޮށްފައެވެ. މީގެ ތެރޭގައި ބޭރު ފައިސާއާ ބެހޭ ގާނޫނާއި ގަވާއިދުތަކަށް ގެނައި ބަދަލުތަކާއި، އިސްކަންދޭންޖެހޭ ދާއިރާތަކަށް ބޭރު ފައިސާ ފޯރުކޮށްދިނުމަށް ބޭންކުތަކާ ގުޅިގެން ކުރަމުންދާ މަސައްކަތްތައް ހިމެނެއެވެ.