ވެލާނާ އިންޓަނޭޝަނަލް އެއާޕޯޓް (ވީއައިއޭ) ގެ ހިދުމަތްތައް އެއްވެސް މެދުކެނޑުމެއް ނެތި ކުރިއަށް ގެންދިއުމަށްޓަކައި ކަމާބެހޭ ހުރިހާ މުއައްސަސާތަކެއްގެ އެއްބާރުލުން ބޭނުންވާނެ ކަމަށް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ މެނޭޖިން ޑިރެކްޓަރު އަދި ސީއީއޯ އިބްރާހީމް ޝަރީފު މުހައްމަދު ވިދާޅުވެއްޖެއެވެ. އެއާޕޯޓުގެ ސަލާމަތާއި ރައްކާތެރިކަން އިތުރަށް ވަރުގަދަކުރުމަށްޓަކައި މިއަދު ވަނީ ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އާއި، މޯލްޑިވްސް މީޓިއޮރޮލޮޖިކަލް ސާވިސް (އެމްއެމްއެސް) އަދި މޯލްޑިވްސް ރެޑް ކްރެސެންޓް (އެމްއާރްސީ) އާއެކު އެމްއޭސީއެލް އިން މުހިއްމު ފަހުމުނާމާތަކެއްގައި ސޮއިކޮށްފައެވެ. މި ރަސްމިއްޔާތުގައި ވާހަކަދައްކަވަމުން ޝަރީފު ވިދާޅުވީ، މިއީ ކުއްލި ނުރައްކަލުގެ ހާލަތްތަކަށް ތައްޔާރުވުމަށް އެޅުނު ވަރަށް ހަރުދަނާ ފިޔަވަޅެއް ކަމަށެވެ. ސީއީއޯ ޝަރީފު ފާހަގަކުރެއްވި ގޮތުގައި މި އެއްބަސްވުންތަކުގެ ސަބަބުން ކަމާބެހޭ އިދާރާތަކުގެ މެދުގައި އޮންނަ ގުޅުން އިތުރަށް ބަދަހިވެ، މަސައްކަތްތައް ކުރިއަށް ގެންދާނެ ވަކި އޮނިގަނޑެއް އެކުލަވާލެވޭނެއެވެ. އަދި މީގެ ސަބަބުން ކޮންމެ އިދާރާއެއްގެ ޒިންމާތައް ސާފުވެ، ގުޅިގެން މަސައްކަތް ކުރުމުގެ ފުރުސަތު ބޮޑުވެގެންދާނެ ކަމަށް އޭނާ ވިދާޅުވިއެވެ. "ވީއައިއޭއަކީ އަބަދުވެސް ބަދަލުތައް އަންނަމުންދާ ތަނެއް. އެއާޕޯޓުގެ މަސައްކަތްތަކަށް މެދުކެނޑުމެއް ނައިސް ކުރިއަށްގެންދެވޭނީ ކަމާ ބެހޭ ހުރިހާ އިދާރާއެއްގެ މެދުގައި އެއްބާރުލުންދެވި އެކީގައި މަސައްކަތްކުރެވިގެން،" ޝަރީފު ވިދާޅުވިއެވެ. އޭނާ އިތުރަށް ވިދާޅުވީ ކުއްލި ހާލަތްތަކަށް ތައްޔާރުވުމަކީ އެންމެ އިދާރާއަކަށް އެކަނި ކުރެވޭނެ ކަމެއް ނޫން ކަމަށާއި، އެކަމުގައި ހާމަކަންބޮޑު މުއާމަލާތްތަކާއި އިތުބާރު އޮތުން މުހިއްމު ކަމަށެވެ. މި ފަހުމުނާމާތަކުގެ ދަށުން ގުޅިގެން ތަމްރީނުތައް ހިންގުމާއި މައުލޫމާތު ބަދަލުކުރުމުގެ މަސައްކަތްތައް އިތުރުވެގެންދާނެއެވެ. މީގެ ނަތީޖާއެއްގެ ގޮތުން ކުއްލި ނުރައްކަލުގެ ހާލަތްތަކުގައި އަވަސް ފިޔަވަޅުތައް އެޅުމުގެ ގާބިލުކަން އިތުރުވެ، އޮޕަރޭޝަނަލް އުސޫލުތައް ހަރުދަނާވާނެކަން ޝަރީފު ފާހަގަކުރެއްވިއެވެ. ނިންމަވާލައްވަމުން ޝަރީފު ވިދާޅުވީ މިއީ ފަސިންޖަރުންނާއި ވައިގެ ދަތުރުފަތުރުގެ ދާއިރާގެ ރައްކާތެރިކަމަށްޓަކައި ކުރެވޭ މުހިއްމު މަސައްކަތެއް ކަމަށެވެ. އަދި ވީއައިއޭއިން ފޯރުކޮށްދޭ ހިދުމަތްތައް އެންމެ މަތީ ފެންވަރުގައި ދެމެހެއްޓުމަށްޓަކައި ދައުލަތުގެ ހުރިހާ އިދާރާތަކާއެކު އެމްއޭސީއެލްއިން އަބަދުވެސް ގުޅިގެން މަސައްކަތް ކުރާނެ ކަމުގެ ޔަގީންކަން އޭނާ ދެއްވިއެވެ.