އަމީނީ މަގު މަރާމާތު ކުރުމުގެ މަސައްކަތް މިރޭ ފެށުމަށް ނިންމާފައިވާ ކަމަށް އެ މަސައްކަތް ކުރާ އެމްޓީސީސީން ބުނެފި އެވެ. އެ ކުންފުނިން ބުނީ އަމީނީ މަހުގެ ސެގްމަންޓް އެކެއް މަރާމާތު ކުރުމުގެ މަސައްކަތް މިރޭ 00:00 ގައި ފަށާނެ ކަމަށެވެ.
މި މަސައްކަތް ފެށުމާއެކު އަމީނީ މަގުގެ އިއްޒުއްދީން މަގާ ދިމާވާ ހިސާބުން ފެށިގެން ދަރުމަވަންތަ ހޮސްޕިޓަލާ ހަމައަށް އޮންނަ ސަރަހައްދު އާންމު ދަތުރުފަތުރަށް ބަންދުވާނެ އެވެ. މި ބަދަލާ ގުޅިގެން ފުލުހުން ވަނީ އެ ސަރަހައްދުގެ ޓްރެފިކް ފްލޯއަށް ބަދަލުތަކެއް ގެނެސްފަ އެވެ.
އެމްޓީސީސީން ބުނީ މަގުން ބައެއް ބަންދުކުރުމާ ގުޅިގެން އެ ކުންފުނިން ދެމުންދާ އާރުޓީއެލް ބަހުގެ ޚިދުމަތުގައި ހިމެނޭ އޯކިޑް ރޫޓްގެ ދަތުރުތަކަށް ބަދަލުތަކެއް އަންނާނެ ކަމަށެވެ. އެގޮތުން ދަރުމަވަންތަ ބަސް ހުއްޓިއަށް މަޑުކުރުމުގެ ބަދަލުގައި ދެން މަޑުކުރާނީ ވެސްޓްޕާކު ބަސް ހުއްޓިއަށެވެ.
މި ބަދަލާ ގުޅިގެން އަމީނީ މަގު ސެގްމަންޓް އެކެއްގެ މަސައްކަތް ނިމެންދެން ސޯޝަލް ސެންޓަރ، އައިޖީއެމްއެޗް އަދި ދަރުމަވަންތަ ބަސް ހުއްޓިއަށް އެ ރޫޓްގެ ބަހެއް މަޑެއް ނުކުރާނެ އެވެ. އަދި އަމީނީ މަގުގެ މި ސެގްމަންޓްގެ މަސައްކަތް ނިމެންދެން އަމީނީ ރޫޓްގެ ބަހުގެ ޚިދުމަތް ވެސް މެދުކެނޑޭނެ ކަމަށް އެމްޓީސީސީން މައުލޫމާތުދެ އެވެ.
މީގެ އިތުރުން R7, R3, R1 އަދި R15 ރޫޓުތަކުން އެންމެ ފަހު މަންޒިލެއްގެ ގޮތުގައި މާލޭގައި ދެން މަޑުކުރާނީ މާފަންނު ބަސް ޓާމިނަލަށެވެ. މި ބަދަލާ ގުޅިގެން އަމީނީ މަގު ސެގްމަންޓް އެކެއްގެ މަސައްކަތް ނިމެންދެން މި ރޫޓްތަކުން ފުޑް ކޯޓު، ދަރުމަވަންތަ އަދި ވެސްޓް ޕާކު ބަސް ހުއްޓިއަށް މަޑު ނުކުރާނެ ކަމަށް އެ ކުންފުނިން ބުނެފައިވެ އެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.