ގޮނޑުދޮށް ހަޑިވުމުން ކަންބޮޑުވެ އަބޫބަކުރު ސްކޫލްގެ ދަރިވަރުންގެ ސިޓީއެއް ޕްރިންސިޕަލަށް

ގދ ތިނަދޫ ގެ ގޮނޑުދޮށްތައް މާ ބޮޑަށް ހަޑިވެފައި ވާތީ އެކަމާ ކަންބޮޑުވުން ފާޅުކޮށް އަބޫބަކުރު ސްކޫލް ދަރިވަރުންގެ ސިޓީއެއް ޕްރިންސިޕަލަށް ފޮނުވައިފިއެވެ.

އަބޫބަކުރު ސްކޫލް ގެ ޕްރިންސިޕަލް މުހައްމަދު އަޖީބްއަށް އެ ސްކޫލް ޕްރައިމަރީ ގްރޭޑް ގެ ދަރިވަރުން މިއަދު ފޮނުވި ސިޓީ ގައި ބުނެފައި ވަނީ ތިނަދޫ ގެ ގޮނޑުދޮށްތައް ވަނީ ވަރަށް ބޮޑަށް ހަޑި ވެފައި ކަމަށާއި ޕްރިންސިޕަލް ބޭނުންފުޅުވާ ނަމަ އެ ކަމަށް ޚާއްސަ ކުރާ ދުވަހަކުން ގޮނޑުދޮށް ސާފު ކުރަން ދާނެ ކަމަށެވެ.

ޕްރިންސިޕަލް އަޖީބް ވަނީ އެ ސިޓީ އޭނާގެ ފޭސްބުކް ޕޭޖްގައި ޢާންމު ކުރައްވާފައެވެ. އެ ޕޯސްޓްގައި ޕްރިންސިޕަލް އަޖީބް ވަނީ މިއީ 21 ވަނަ ގައުމުގެ ތަޢުލީމުން، ދެކެން ބޭނުންވާފަދަ ދަރިވަރުން ކަމުގައި ޕްރިންސިޕަލްގެ ޕޯސްޓުގައި ލިޔުއްވާފައިވެއެވެ.

އަބޫބަކުރު ސްކޫލް ދަރިވަރުންގެ މި ސިޓީ ވަނީ ގިނަ ބައެއްގެ ސަމާލުކަމަށް އައިސް ފައެވެ.

މިކަމާ ގުޅިގެން ހުވަދޫ ނޫހުން އަބޫބަކުރު ސުކޫލުގެ ޕްރިންސިޕަލާ ގުޅުމުން ވިދާޅުވީ މި ސިޓީ ލިބުމުން އުފަލުން ފެންކަޅިވިކަމަށެވެ. އަދި މިކުދިންގެ އެދުމާ އެއްގޮތަށް މި ޙަރަކާތް ވަރަށް އަވަހަށް ކުރިއަށް ގެންދާނެ ކަމަށްވެސް ވިދާޅުވިއެެވެ.

ތިނަދޫ ގެ ވެށި ވަރަށް ބޮޑަށް ހަޑިވެ ފައި ވާތީ ނިމި ދިޔަ ހަފުތާގެ ތެރޭގައި މޯލްޑިވްސް ނޭޝަނަލް ޔުނިވަރސިޓީ ތިނަދޫ ކެމްޕަސް އިން ވެސް ވަނީ އަމިއްލަ ހަރަކާތެއްގެ ގޮތުގައި ނުކުމެ ރަށުގެ އެއް ސަރަހައްދު ސަާފު ކޮށްފައެވެ.