ޑރ އަބްދުއްސަމަދު މެމޯރިއަލް ހޮސްޕިޓަލުގައި ލެޕަރޮސްކޯޕިކް ސާޖަރީގެ ޚިދުމަތް ފަށައިފި

ގދ ތިނަދޫ ގައި ހުންނަ ޑރ. އަބްދުއްސަމަދު މެމޯރިއަލް ހޮސްޕިޓަލު (އޭއެސްއެމްއެޗް)ގައި ލެޕަރޮސްކޮޕިކް ސާޖަރީގެ ޚިދުމަތް މިއަދު ފަށައިފިއެވެ.

އެ ހޮސްޕިޓަލުން ބުނީ އަލަށް ފެށި ޚިދުމަތަކީ ވެސް އެންމެ ޒަމާނީ ފެންވަރުގެ ވަސީލަތްތައް ގާއިމްކޮށް ދޭ ޚިދުމަތްތަކެއް ކަަމަށެވެ.

އެގޮތުން ލެޕަރޮސްކޮޕިކް ސާޖަރީގެ ޚިދުމަތާއެކު އަލަށް އެ ހޮސްޕިޓަލުގައި ފެށި އިތުރު ޚިދުމަތަކީ ފަސޭހަ ނުވެ، ދިގު މުއްދަތަކަށް ހުންނަ ފާރުގަނޑުތައް ފަސޭހަކުރުމަށް އެޑްވާންސްޑް ވޫންޑް ކެއާ ކްލިނިކެކެވެ

ލަޕަރޮސްކޮޕިކް ސާޖަރީ އަކީ ބަނޑު ކަފާލުމުގެ ބަދަލުގައި ބަނޑުގައި ކުދި ލޯވަޅުތަކެއް އަޅައިގެން ކުރާ ސާޖަރީ އެކެވެ. ކެމަރާއާއި ކުދިކުދި ތަފާތު އާލާތްތަކެއް ބޭނުންކޮށްގެން ހަދާ މިފަދަ ސާޖަރީތަކާ ގުޅިގެން ބަލިމީހާ އުފުލަންޖެހޭ ވޭން ކުޑަވެ ފަސޭހަވުން އަވަސްވެ އެވެެ.

https://twitter.com/drasmhospital/status/1653647241419304960?s=20

ޖަރުމަނު ބްރޭންޑެއްކަމަށްވާ އެމްނޮޓެކްސްގެ ލެޕްރޮސްކޮޕިކް މެޝިނާއި އިންސްޓްރުމަންޓުތައް އެ ހޮސްޕިޓަލަށް ލިބުނީ މާޗު މަހުގެ ތެރޭގައެވެ. 

އަދި އެ ހޮސްޕިޓަލުގައި ކުރާ އެންމެ ފުރަތަމަ ލެޕްރޮސްކޮޕިކް ސާޖަރީ ކުރަނީ އައިޖީއެމްއެޗްގެ ޑޮކްޓަރުންނެވެ.