ދެކޮޅުވެރިކަމާއި ހަސަދަ ދޫކޮށްލުމަށް ރައީސް އިލްތިމާސްކޮށްފި

ދެކޮޅުވެރިކަމާއި ހަސަދަ ވުމާއި ބައިބައިވުން ދޫކޮށް، އެކުވެރިކަމާއި އެކު އެއްބައިވަންތަކަމުގެ މަތީގައި ގައުމީ މަސްލަހަތު ކުރިއަށް ނެގުމަށް ރައީސް އިބްރާހިމް މުހައްމަދު ޞާލިހް އިލްތިމާސްކުރައްވައިފިއެވެ.

ރައީސް މިކަމަށް އިލްތިމާސްކުރައްވާފައިވަނީ، ހިޖުރީ އައު އަހަރު 1445 ފެށުމުގެ މުނާޞަބަތާއި ގުޅިގެން ފޮނުއްވި ޚިޠާބުގައެވެ.

އެގޮތުން، ހިޖުރައިގެ މަތިވެރި ހާދިސާއާއި ގުޅޭ އެންމެ މުހިންމު މަގްސަދަކީ، މައްކާގެ ބިމުގައި ނާމާންކަމާއި ހިތްދަތިކަމުގައި އުޅެމުން ދިޔަ މުސްލިމުންނަށް، މަދީނާގެ ބިމުން އުފާވެރިކަމާއި އަމާންކަން ހޯއްދަވައިދެއްވުންކަން ރައީސް ފާހަގަކޮށްފައިވެއެވެ.

"ހިޖްރީ އައު އަހަރެއްގެ ފެށުން ފާހަގަކުރާ މި އުފާވެރި މުނާސަބަތުގައި، އެ މަތިވެރި ހާދިސާއިން އަޅުގަނޑުމެންނަށް ލިބިދޭ މިފަދަ ފިލާވަޅުތަކުން އިބްރަތް ހާސިލުކުރެއްވުމަށް، ރާއްޖޭގެ ލޮބުވެތި ރައްޔިތުންނަށް އިލްތިމާސް ކުރަމެވެ.".

އަދި ހިޖްރައިގެ ބިންގަލުގެ މަތީގައި އުފަންވި އިސްލާމީ އުންމަތް ދުނިޔެއަށް ސާބިތުކޮށްދިނީ، އެކުވެރިކަމާއި އެއްބައިވަންތަކަމާއި އަހުވަންތަކަމުން އިންސާނީ މުޖްތަމައަށް ލިބިގެންދާ ކުރިއެރުމާއި ފާގަތިކަން ކަމަށްވެސް ވިދާޅުވިއެވެ.

މީގެ އިތުރުން ދިވެހިންގެ މެދުގައި އޮތް ހަމަޖެހުމާއި ޞުލްޙަވެރިކަމުގެ މަތީގައި ގައުމު ބިނާކުރުމަށާއި، އިްތިސާދީ ގޮތުންނާއި އިޖްތިމާއީ ގޮތުން ކުރިއަރާފައިވާ ގައުމެއްގެ ގޮތުގައި އަންނަން އޮތް ޖީލްއާއި ހިސާބަށް ވާސިލްވުމަށް މަސައްކަތްކުރުމަށް ރައީސް ވިދާޅުވިއެވެ.

"މާތް ނަބިއްޔާ ކޮށްޓަވައިދެއްވި މަގުގައި ސާބިތުވެ ތިއްބެވި އެކަލޭގެފާނުގެ މިތުރު ޞަޙާބީން ދައްކަވައިދެއްވީ، މުޖުތަމަޢުގެ ހަމަޖެހުމާއި ޞުލްޙަ މަސަލަސްކަން ދެމެހެއްޓުމުގައި ފަރުދީ ޒިންމާ އަދާކުރުމުގެ އެންމެ މަތިވެރި ނަމޫނާއެވެ" ރައީސް ވިދާޅުވިއެވެ.

އަދި ރައީސްގެ ޚިޠާބުގައި ވަނީ މި ފެށުނު ހިޖުރީ 1445 ވަނަ އަހަރަކީ، ދިވެހިންނަަށާއި ދިވެހިރާއްޖެއަށް ބާއްޖަވެރިކަމާއި ތަނަވަސްކަން ގެނެސްދޭނެ އަހަރެއް ކަމުގައި ލެއްވުން އެދޭ ކަމަށް ވިދާޅުވެފައެވެ.