ރައްޔިތުން ހަވާލުކޮށްފައިވާ ރައީސުލްޖުމްހޫރިއްޔާ ކަމުގެ މަސްއޫލިއްޔަތުން ރެކެން އުޅުއްވާނެ ބޭފުޅަކަށް ވެވަޑައިނުގަންނަވާނެ ކަމަށާއި ވެވަޑައިގެންފައިވާ ވައުދެއް ނަމަ ފުރިހަމަ ކުރައްވާނެކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
މުއިއްޒު މިހެން ވިދާޅުވީ، މާލެ ސިޓީ ކައުންސިލްގެ ހަތަރު ވަނަ ދައުރުގެ 119 ވަނަ އާންމު ޖަލްސާގައެވެ.
ނިމިގެން ދިޔަ ރިޔާސީ އިންތިހާބުގެ ކެމްޕެއިން ތެރޭގައި ރައްޔިތުންނަށްޓަކައި އެމަނިކުފާނުގެ ވައުދުތަކަށް އިޝާރާތް ކުރައްވައި އޭގެ ތެރޭގައި މާލެ އަށް ވެވަޑައިގެންނެވި ވައުދުތައް ހިމެނޭ ކަން ފާހަގަ ކުރެއްވުމާއެކު މުއިއްޒު ވިދާޅުވީ އެއިން ކޮންމެ ކަމެއް، އެމަނިކުފާނު ދެންނެވި ގޮތަށް ފުރިހަމަ ކުރައްވާނެ ކަމަށެވެ.
އަދި ރައްޔިތުންނަށް ވެވަޑައިގެންނެވި ވައުދުތައް ފުއްދެވުމުގައި އަމަލާއި ބަހާ ދިމާވާނެ ކަމަށް ވެސް ޑރ މުއިއްޒު ވިދާޅުވިއެވެ.
"ރައްޔިތުން ގާތަށް އައިސް މިކަމެއް ކޮށްދޭނަމޭ ކިއާފައި ދެން ގޮސް، އެކަމާ ދުރަށް ގޮސް ރެކެން މަސައްކަތް ކުރާ މީހަކަށް އަޅުގަނޑެއް ނުވާނެ. އަމަލާއި ބަހާ އިރާދަކުރެއްވިއްޔާ ދިމާވާނެ. އެ ހަގީގީ މާނައިގައި އެކަން ކުރުމުގެ ނިޔަތުގައި ނޫނިއްޔާ ނޯންނާނެ މުޅި ކެމްޕެއިންގައި އެންމެ ވަގުތެއްގައި ވެސް އެއްވެސް ވާހަކައެއްގައި އެ ނޫން ގޮތަކަށް ވާހަކައެއް ދައްކާފައެއް." މުއިއްޒު ވިދާޅުވިއެވެ.
މުއިއްޒުގެ ވާހަކައިގައި ވަނީ ކެމްޕެއިންގައި އެހީތެރިކަން ދެއްވި ހުރިހާ ކައުންސިލަރުންނާއި މުވައްޒަފުންނަށް ޝުކުރު ދަންނަވައިފައެވެ. މޭޔަރު ކަމަށް ހޮވިވަޑައިގަތީއްސުރެ، މިއަދާ ހަމައަށް ކައުންސިލަރުންނާއި މުވައްޒަފުން ދެއްވި އެއްބާރުލުން ފާހަގަ ކުރައްވާ ކަމަށް ވެސް އެމަނިކުފާނު ވިދާޅުވިއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.