ވޯލްޑްބޭންކާއި އައިއެމްއެފް ބޯޑުގެ ޗެއާ ކަމަށް ފުރަތަމަފަހަރަށް ރާއްޖޭގެ ސެންޓްރަލް ބެންކުގެ ގަވަރުނަރު އަލީ ހާޝިމް ހޮވިވަޑައިގެންފިއެވެ.
ގަވަރުނަރު ހާޝިމް އެ މަގާމަށް ހޮވިވަޑައިގަތީ މޮރޮކޯގެ މަރަކެޝްގައި މިހާރު ކުރިއަށްދާ ވޯލްޑް ބޭންކް ގްރޫޕާއި އައިއެމްއެފްގެ އަހަރީ ބައްދަލުވުމުގައި ނެގި ވޯޓުގައި ބައިވެރިވި ހުރިހާ ގައުމުތަކެއްގެ ތާއީދާއެކުއެވެ.
މިއީ އެ ބޯޑުގެ ޗެއާއަކަށް ރާއްޖެ ހޮވުނު ފުރަތަމަ ފަހަރެވެ. ޗެއާކަން ކުރައްވާ ބޭފުޅުން އައިއެމްއެފާއި ވޯލްޑް ބޭންކްގެ އަހަރީ އާންމު ޖަލްސާތައް ކުރިއަށް ގެންދިއުމުގައި އެންމެ އިސް ބޭފުޅެއްގެ ގޮތުން ހަރަކާތްތެރިވާނެއެވެ.
ވޯލްޑް ބޭންކާއި އައިއެމްއެފްގެ ގަވަރުނަރުންގެ ބޯޑުގެ ޗެއާއަކީ ކޮންމެ އަހަރަކުވެސް ހަމަޖައްސަނީ އައިއެމްއެފްގެ މައިގަނޑު ފަސް ސަރަހައްދުގެ ތެރޭގައި ދައުރުވާ މަގާމެކެވެ. އެގޮތުން 2024 ވަނަ އަހަރުގެ ޗެއާމަން ކަމަށް ހަމަޖައްސަން ނިންމާފައިވަނީ އޭޝިއާ ޕެސިފިކް ސަރަހަދުއްގެ މެމްބަރު ގައުމުތަކުން ބޭފުޅެކެވެ.
ވޯލްޑް ބޭންކާއި އައިއެމްއެފްގެ ގަވަރުނަރުންގެ ބޯޑުގެ ޗެއާގެ މަގާމަށް ހޮވިވަޑައިގަތުމާ ގުޅިގެން ގަވަރުނަރު އަލީ ހާޝިމް ވިދާޅުވީ މިއީ ރާއްޖެއަށް ލިބުނު ވަރަށް ބޮޑު ޝަރަފެއް ކަމަށެވެ.
ގަވަރުނަރުންގެ ބޯޑުގެ ޗެއާގެ އެންމެ މުހިންމު މަސްއޫލިއްޔަތަކީ އައިއެމްއެފް އަދި ވޯލްޑް ބޭންކު މެންބަރު ގައުމުތަކުގެ މަރުކަޒީ ބޭންކުތަކުގެ ގަވަރުނަރުންނާއި ފިނޭންސް މިނިސްޓަރުންގެ އަހަރީ ބައްދަލުވުންތައް ޗެއާކުރެއްވުމެވެ. މީގެ އިތުރުން، ރެމިއުނެރޭޝަން އޮފް އެގްޒެކެޓިވް ޑިރެކްޓާސް އެންޑް ދެއާ އަލްޓަނޭޓްސް ކޮމިޓީ، ޖޮއިންޓް ޕްރޮސީޖާ ކޮމިޓީ އަދި މަލްޓިލެޓެރަލް އިންވެސްޓްމަންޓް ގެރެންޓީ އޭޖެންސީ ޕްރޮސީޖާ ކޮމިޓީގެ ޗެއާކަން ކުރައްވާނީ ވެސް ގަވަރުނަރުންގެ ބޯޑުގެ ޗެއާޕާސަންއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.