މޯލްޑިވްސް ޕޯޓްސް ލިމިޓެޑް (އެމްޕީއެލް) ގައި އޮތް މަސައްކަތުގެ ދާއިރާތަކުގެ މައުލޫމާތު ސްކޫލް ދަރިވަރުންނާ ހިއްސާކޮށް، 100 ދަރިވަރުންނާއެކު "ޕޯޓް އޯޕަން ޑޭ"ގެ މިއަދު ބާއްވައިފި އެވެ.
މިއީ ޕޯޓުގެ މަސައްކަތުގެ ދާއިރާތަކަށް ސްކޫލް ދަރިވަރުންގެ ޝައުގުވެރިކަން އިތުރުކުރުމުގެ ގޮތުން ބޭއްވި ހަރަކާތެކެވެ. މީގެ އިތުރުން އެމްޕީއެލްއިން ފާހަގަ ކުރި ގޮތުގައި ކުންފުނީގެ ސްޓޭކް ހޯލްޑަރުންނާއި އޮތް ގުޅުން ވަރުގަދަ ކުރުމަކީވެސް ހަރަކާތުގެ އެއް މަގްސަދު ކަމުގައެވެ.
އުމުރުން 13 އަހަރާއި 18 އަހަރާ ދެމެދުގެ ސްކޫލް ދަރިވަރުންނަށް އަމާޒުކޮށްގެން ބޭއްވި "ޕޯޓް އޯޕަން ޑޭ" 100 އަށްވުރެ ގިނަ ދަރިވަރުން ބައިވެރިވި ކަމަށެވެ. އެގޮތުން މާލެ އާއި އަތޮޅުތެރޭގެ ބައެއް ސްކޫލްތަކުގެ ދަރިވަރުން ހިމެނޭ ކަމަށް އެމްޕީއެލްއިން ވަނީ ބުނެފައެވެ.
އޭގެ ތެރޭގައި ހިމެނެނީ މާލޭގެ ހުރަވީ ސްކޫލާއި އިމާދުއްދީން ސްކޫލާއި ކަލާފާން ސްކޫލާއި ތާޖުއްދީން ސްކޫލާއި ހުޅުމާލޭގެ ސަލާހުއްދީން ސްކޫލާއި ހުވަދޫ ސްކޫލާއި ބ.އަތޮޅު ތަޢުލީމީ މަރުކަޒާއި ނ.ހެނބަދޫ ސްކޫލް އަދި ރ.އިނގުރައިދޫ ސްކޫލްގެ ދަރިވަރުންނެވެ.
މި ހަރަކާތުގައި ހިމެނޭ ސެޝަންތައް ކުރިއަށް ގެންދިޔައީ ދެ ދަންފަޅިއަކަށް ބަހާލައިގެނެވެ. ސްކޫލްތަކުގެ ދަރިވަރުންނަށް ޕޯޓުގެ އެކި ދާއިރާތަކުގެ މައުލޫމާތުތައް ހިއްސާކުރުމުގެ އިތުރުން ޕޯޓުގެ އަމަލީ މަސައްކަތްތައް ބަލާލުމަށް އެ ދަރިވަރުން ވަނީ މާލޭ ވިޔަފާރި ބަނދަރަށް ޒިޔާރަތްކޮށްފަ އެވެ.
މީގެ އިތުރުން ސޭފްޓީ އެންޑް ސެކިއުރިޓީ ޑްރިލް އަކާއި ޕޯޓުގައި ބޭނުންކުރާ މެޝިންތައް ބޭނުންކުރާ ގޮތް ދަރިވަރުންނަށް ވަނީ ދައްކާލައިފަ އެވެ. އަދި ހުޅުމާލެ އިންޓާނޭޝަނަލް ޓަރމިނަލް އަށް ވެސް ދަރިވަރުން ޒިޔާރަތްކުރި އެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.