ކުޅުދުއްފުށީ ސިޓީގެ ގެއެއްގައި ރޯވެ، ބޭނުން ނުކުރެވޭ ވަރަށް އަނދައިފި

ކުޅުދުއްފުށީ ސިޓީގެ ގެއެއްގައި އަލިފާން ރޯވެ، ގެ ބޭނުން ނުކުރެވޭ ވަރަށް އަނދައިފިއެވެ.

އެމްއެންޑީއެފްއިން ބުނީ އެ ގޭގައި ރޯވިކަމުގެ މައުލޫމާތު ހދ.ކުޅުދުއްފުށީ ފަޔާ ސްޓޭޝަނަށް ލިބުނީ މިއަދު މެންދުރުފަހު 1:17 ގައި ކަމަށެވެ. އެ މައުލޫމާތު ލިބުމާއެކު އެ ފަޔާ ސްޓޭޝަންގެ ފަޔާ ފައިޓަރުން އެ ސަރަހައްދަށް ގޮސް،އަލިފާން ނިވުމުގެ މަސައްކަތް ކޮށްފައިވާ ކަމަށެވެ.

ފަޔަރ ފައިޓަރުން ކުރި މަސައްކަތުން އަލިފާން ނިއްވާލެވިފައިވަނީ 2:12 ހާއިރު ކަމަށާއި އެ ހާދިސާގައި އެެއްވެސް މީހަކަށް އަނިޔާއެއް ލިބިފައި ނުވިނަމަވެސް އެ ގެއަށް ވަރަށް ބޮޑަށް ގެއްލުންވެފައިވާ ކަމަށް އެމްއެންޑީއެފްއިން ވަނީ ބުނެފައެވެ.

އެމްއެންޑީއެފުން ހާމަކުރި ގޮތުގައި ކުޅުދުއްފުށި ސިޓީގައި އަލިފާން ރޯވެފައިވަނީ، "ސިގްނަލް" ނަމަކަށް ކިޔާ ގެއެއްގައެވެ.

އަލިފާން ރޯވި ގެއަކީ ދެފިރިހެނުންނާއި އަންހެނެއްގެ އިިތުރުން ތިންކުޑަކުއްޖަކު އުޅެމުން އަންނަ ގެއެއް ކަމަށް ހުވަދޫނޫހަށް މައުލޫމާތު ވަނީ ލިބިފައެވެ.

އޭގެ ތެރެއިން އެއް ފިރިހެނަކަށް ދުމުގެ އަސަރުކޮށްގެން ހޮސްޕިޓަލުގައި ވަނީ ފަރުވާ ދީފައެވެ. އަދި އެ އާއިލާއަށް ކުޅުދުއްފުށީ ސިޓީ ކައުންސިލްގެ ފަރާތުން ވަނީ ވަގުތީ ހިޔާ ހަމަޖައްސަައިދީ އެ މީހުން ބަދަލުކޮށްފައެވެ.