އިޒްރޭލުގެ ޕާސްޕޯޓު މަނާކުރާ ގާނޫނަށް އިސްލާހު ގެނައުމާމެދު މަޖިލިހުގެ ބަހުސް މާދަމާ ފަށާނެ

އިޒްރޭލުގެ ޕާސްޕޯޓުގައި ރާއްޖެ އެތެރެވުން މަނާކުރާ ގާނޫނަށް އިސްލާހު ގެނައުމާމެދު ރައްޔިތުންގެ މަޖިލީހުގެ މާދަމާގެ ޖަލްސާގައި ބަހުސް ފަށާނެއެވެ.

އިޒްރޭލް ޕާސްޕޯޓް މަނާ ކުރުމަށް "ދިވެހިރާއްޖޭގެ އިމިގްރޭޝަން ގާނޫނު"، މި ގާނޫނުގެ އަށް ވަނަ މާއްދާ އަށް އިސްލާހު ހުށަހަޅުއްވާފައި ވަނީ އެމްޑީޕީގެ ފަރާތުން ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.

"ދިވެހިރާއްޖޭގެ އިމިގްރޭޝަން ގާނޫނު"، މި ގާނޫނުގެ އަށް ވަނަ މާއްދާ އަކީ، ރާއްޖެއަށް އެތެރެ ނުވެވޭނެ ހަތް ކެޓަގަރީއެއްގެ ބަޔަކު ކަނޑައަޅައިފައިވާ "ރާއްޖެ އެތެރެވުމުގެ ހުއްދަ ނެތް މީހުން" ބަޔާންކުރާ މާއްދާއެވެ.

މީކާއީލް އިސްލާހު ހުށަހަޅުއްވާފައި ވަނީ އެ ގާނޫނުގެ އަށް ވަނަ މާއްދާގެ ހަތް ވަނަ ނަންބަރުގެ ފަހަތަށް ނަންބަރެއް އިތުރުކޮށް އެ ކެޓަގަރީގައި އިޒްރޭލު ޕާސްޕޯޓް ގެންގުޅޭ މީހުން ހިމެނުމަށެވެ.

ރައްޔިތުންގެ މަޖިލީހުގެ މާދަމާގެ ޖަލްސާގެ ފުރަތަމަ ކަމަށް އެޖެންޑާ ކޮށްފައި އޮތީ އެ އިސްލާހު ގާނޫނަށް ގެނައުމާ މެދު ބަހުސް ކުރުމަށެވެ.

ގާނޫނަށް މި އިސްލާހު ހުށަހަޅާފައި ވަނިކޮށް، އިޒްރޭލު މީހުން ރާއްޖެއަށް އައުން މަނާކުރުމަށްޓަކައި ގާނޫނު އިސްލާހު ކުރަން ޖުލައި މަހުގެ ދެވަނަ ދުވަހު ކެބިނެޓުން ވަނީ ނިންމައިފައެވެ.