ޔޫއޭއީ އެމްބަސީން ކުލި ނުދައްކާ މައްސަލަ ނުބެލޭނެ ކަމަށް ހުކުމްކޮށްފި

ސިވިލް ކޯޓުން ނިންމި ހުކުމެއްގައި، ރާއްޖޭގައި ހުންނަ ޔުނައިޓެޑް އަރަބް އެމިރޭޓްސް (ޔޫއޭއީ) އެމްބަސީން ކުލި ނުދައްކާ މައްސަލަ އެ ކޯޓުން ނުބެލޭނެ ކަމަށް ކަނޑައަޅައިފިއެވެ.

މި މައްސަލަ ކޯޓަށް ހުށަހެޅީ އާއިޝަތު އަހުމަދު ދީދީ ނަމަކަށް ކިޔާ ފަރާތަކުންނެވެ. އޭނާ ބުނި ގޮތުގައި، އޭނާގެ ނަމުގައި ރަޖިސްޓްރީ ކޮށްފައިވާ ގ. ނިއުޝާާ ކިޔާ ގޭގެ 5، 6 އަދި 7 ވަނަ ފަންގިފިލާ 1 މެއި 2020 އިން އޮކްޓޯބަރު 2022 ގެ ނިޔަލަށް ޔޫއޭއީ އެމްބަސީގެ އޮފީސް ހިންގުމަށް ކުއްޔަށް ދީފައިވާއިރު، ކުލީގެ ގޮތުގައި ލިބެންޖެހޭ 42،857.40 ޔޫއެސް ޑޮލަރު ނުލިބޭ ކަމަށެވެ.

އޭގެ އިތުރުން، އެއްވެސް ނޯޓިހެއް ނުދީ ކުލީގެ އެއްބަސްވުން އުވާލާފައިވާތީ، 48،720 ޔޫއެސް ޑޮލަރާއި ޤާނޫނީ ޚަރަދުގެ ގޮތުގައި ހޭދަކުރި 750 ޔޫއެސް ޑޮލަރު ހިމަނައިގެން ޖުމްލަ 92،427.40 ޔޫއެސް ޑޮލަރު ހޯދުމަށް އެދިފައިވެއެވެ.

ސިވިލް ކޯޓުން މައްސަލަ ބަލައި ނުގަތުމަށް ނިންމީ، ރާއްޖޭގައި ހުންނަ އެމްބަސީތަކާއި ހައި ކޮމިޝަންތަކަކީ ވިއެނާ ކޮންވެންޝަން އޮފް ޑިޕްލޮމެޓިކް ރިލޭޝަންސް މުއާހަދާގެ ދަށުން އިމްތިޔާޒު ލިބިގެންވާ ތަންތަން ކަމަށް މަދަނީ އިޖުރާއަތުގެ ޤާނޫނުގައި ބަޔާންކޮށްފައިވާތީއެވެ. އެހެންކަމުން، މި މައްސަލަ ކުރިއަށް ގެންދެވޭނެ ތަނެއް ނެތް ކަމަށް ކޯޓުން ނިންމިއެވެ.

ކޯޓުން އިތުރަށް ފާހަގަކުރި ގޮތުގައި، މައްސަލައާ ގުޅިގެން ދައުވާލިބޭ ފަރާތުގެ ބަހެއް ހޯދުމަށް އެމްބަސީއަށް ދައުވާ ފޯމުގެ ލިޔުންތައް ފޮނުވުމަށް މަސައްކަތްކުރި ނަމަވެސް، އެ ލިޔުންތައް ވެސް ރައްދުކުރެވިފައި ނުވެއެވެ.

މި ހުކުމާއެކު، އަމިއްލަ ފަރާތަކާއި ޔޫއޭއީ އެމްބަސީއާ ދެމެދު އުފެދުނު މި މަދަނީ ޚުޞޫމާތު ބެލުމުގެ އިޚްތިޞާޞް ސިވިލް ކޯޓަށް ލިބިގެން ނުވާކަން ސާފުވެގެން ދިޔައެވެ.