ރައީސް ޑރ މުއިއްޒު، އެސްޓޯނިއާގެ ގްރީނާޖީ ޑޭޓާ ސެންޓަރަށް ޒިޔާރަތް ކުރައްވައިފި

އެސްޓޯނިއާގެ ވެރިރަށް ޓެލިންގައި ހުންނަ ގްރީނާޖީ ޑޭޓާ ސެންޓަރު (ޖީޑީސީ) އަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޒިޔާރަތް ކުރައްވައިފިއެވެ. މިއީ އެސްޓޯނިއާގެ ރައީސް، ޑރ. އަލާރް ކަރިސްގެ ދަޢުވަތަކަށް ރައީސް މުއިއްޒު އެ ގައުމަށް ކުރައްވަމުންގެންދަވާ ރަސްމީ ދަތުރުފުޅުގެ ތެރެއިން ކުރެއްވި ޒިޔާރަތެކެވެ.

ޖީޑީސީއަށް ވަޑައިގަތުމުން ރައީސް މުއިއްޒަށް މަރުޙަބާ ދެންނެވީ އެ ސެންޓަރުގެ ޗީފް އެގްޒެކެޓިވް އޮފިސަރ އަދި ޗީފް ޑިވެލޮޕްމަންޓް އޮފިސަރ މިސްޓަރ ކާރޓް އެވަރޓްގެ އިތުރުން ޗީފް ޓެކްނޮލޮޖީ އޮފިސަރ ޓޫމަސް ކޭލްއެވެ. އޭގެފަހުން، ޖީޑީސީގެ ބާނީ އަލްފާޟިލް އުއްލާރު ޖައްސޫ ވަނީ ރައީސަށް އެ މަރުކަޒާ ބެހޭ ޕްރެޒެންޓޭޝަނެއް ހުށަހަޅުއްވާފައެވެ.

މި ޕްރެޒެންޓޭޝަންގައި ޖައްސޫ ވަނީ ޖީޑީސީގެ މައިގަނޑު އަމާޒަކީ ޑިޖިޓަލައިޒޭޝަންގެ ޒަރިއްޔާއިން އެންމެން ގުޅިލާމެހިފައިވާ ޑިޖިޓަލް މުސްތަގުބަލެއް އެ ސެންޓަރުގެ ޕާޓްނަރުންނާ އެކު ކޯ-ކްރިއޭޓް ކުރުމަށް އެޑްވައިޒަރީ ރޯލެއް ފޯރުކޮށްދިނުންކަން ފާހަގަކުރައްވާފައެވެ.

ޕްރެޒެންޓޭޝަނަށްފަހު، ރައީސުލްޖުމްހޫރިއްޔާ ވަނީ ޖީޑީސީގެ ފެސިލިޓީތަކަށް ޒިޔާރަތްކުރައްވައި، އެތަނުގެ އެނަރޖީ އެފިޝިއަންޓް އޮޕަރޭޝަންތަކާއި ޑޭޓާ ރައްކާކުރުމާ ބެހޭ ގޮތުން މަޢުލޫމާތު ހޯއްދަވާފައެވެ.

2020 ވަނަ އަހަރު އުފެދުނު ޖީޑީސީއަކީ ބޯލްޓިކް ސަރަހައްދުގެ އެންމެ ބޮޑު ޑޭޓާ ސެންޓަރެވެ. މި ފެސިލިޓީގައި އެޑްވާންސް އޭއައި ޑްރިވެން ސެކިއުރިޓީ ސިސްޓަމްތަކާއި ސަވައިލެންސް ހިމެނެއެވެ. އަދި ދެމެހެއްޓެނިވި ގޮތެއްގައި ހަކަތަ އުފެއްދުމަށްޓަކައި ވޭސްޓް ހީޓް ރިސައިކަލް ކުރުމުގެ މަސައްކަތް ވެސް އެ ސެންޓަރުން ކުރެއެވެ.

ޖީޑީސީއަކީ އެ ސަރަޙައްދުގައި ދެމެހެއްޓެނިވި ގޮތެއްގައި ޑިޖިޓަލް ޓްރާންސްފޯމޭޝަނަށް އެހީތެރިވެދީ، އިތުބާރުކުރެވޭ، ހަރުދަނާ، ދެމެހެއްޓެނިވި އަދި ކަސްޓަމަރުންނަށް ފޯކަސްކުރެވޭ ޑިޖިޓަލައިޒޭޝަންގެ ޒަރިއްޔާއިން ރަށްތައް ގުޅާލުމުގެ އަމާޒުގައި ގާއިމް ކުރެވުނު ފެސިލިޓީއެކެވެ.

ރައީސް މުއިއްޒުގެ މި ދަތުރުފުޅުގައި ސަރުކާރުގެ މަތީ ފަންތީގެ ވަފުދެއް ބައިވެރިވެވަޑައިގަންނަވައެވެ.