ބޮޑު ހިލައިގެ ދަތިތަކެއް ހައްލުކޮށް، ރަށްރަށުގެ ގިރާ ސަރަހައްދުތައް ހިމާޔަތްކުރަން ފަށަނީ

ރާއްޖޭގެ ރަށްރަށުގައި ގިރާ ސަރަޙައްދު ހިމާޔަތްކުރުމުގެ މަޝްރޫޢުތައް މަޑުޖެހިފައިވަނީ ބޮޑު ހިލަ ލިބުމުގައި ދަތިތަކެއް ހުރުމުގެ ސަބަބުން ކަމަށާއި، އެކަން ޙައްލުކޮށް އެމްޓީސީސީގެ އެހީއާއެކު ވަރަށް އަވަހަށް ގިރާ ސަރަޙައްދުތައް ހިމާޔަތްކުރުމުގެ މަޝްރޫޢުތައް ފަށްޓަވާނެ ކަމަށް ރައީސް ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.

ރ. އަތޮޅުގެ 11 ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި ރ. ހުޅުދުއްފާރަށް ވަޑައިގެން އެ ރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ޑރ. މުޢިއްޒު ވިދާޅުވީ، ރާއްޖޭގެ ރަށްރަށުގައި ގިރާ ސަރަޙައްދު ހިމާޔަތްކުރުމުގެ މަޝްރޫޢުތައް ހުއްޓިފައި އޮތީ ބޮޑު ހިލަ ނުލިބިގެން ކަމަށެވެ. ހުޅުދުއްފާރުގެ ގިރާ ސަރަޙައްދު ހިމާޔަތްކުރުމަށް އެމްޓީސީސީއާ ޙަވާލުކޮށްފައިވާ އިރު، އެ މަޝްރޫޢު ވެސް ހުއްޓިފައިވާކަން ރައީސް ފާހަގަކުރެއްވިއެވެ.

އެހެންނަމަވެސް، ބޮޑު ހިލަ ސަޕްލައިކުރުމުގައި ދިމާވި ދަތިތައް މިހާރު ޙައްލުކޮށްފައިވާ ކަމަށް އެމަނިކުފާނު ވިދާޅުވިއެވެ. "އެހެންވީމާ ކުރިއަށް އޮތް މަސްތަކުގައި ޝެޑިއުލްއެއްގެ ތެރެއިން މި ރަށް ވެސް ހިމަނައިގެން އެމްޓީސީސީން ބޮޑު ހިލަ ޖައްސަން ޖެހިފައި ހުރި މަޝްރޫޢުތައް، އެއީ ގިރާ ސަރަޙައްދު ހިމާޔަތްކުރުމާއި ބަނދަރުގެ އެކި ކަހަލަ ކަންކަން ހިނގައިގަންނާނެ،" ރައީސް ވިދާޅުވިއެވެ.

ރައީސް ޑރ. މުޢިއްޒުގެ ވާހަކަފުޅުގައި ވަނީ މި އަހަރު ހުޅުދުއްފާރާއެކު އެހެނިހެން ރަށްރަށުގެ ގިރާ ސަރަޙައްދުތައް ހިމާޔަތްކުރުމުގެ މަޝްރޫޢު ކުރިއަށް ގެންދަވާނެ ކަމުގެ ޔަޤީންކަން ދެއްވައިފައެވެ. އަދި ދާދި އަވަހަށް މަޝްރޫޢު މޮބިލައިޒްކުރެވިގެން ހިނގައިގަންނަ ތަން ފެންެންނާނެ ކަމަށް އެމަނިކުފާނު ވިދާޅުވިއެވެ.

މީގެ އިތުރުން، ހުޅުދުއްފާރުގެ ބަނދަރުގެ ބޭރު ތޮށި ބޭނުންކުރެވޭ ކަހަލަ ގޮތަކަށް ބަދަލުކުރުމާއި، ސްކޫލަށް 12 ކްލާސްރޫމް އިތުރުކުރުން ފަދަ އެހެނިހެން ތަރައްޤީގެ މަޝްރޫޢުތައް ވެސް ކުރިއަށް ގެންދަވާނެ ކަމަށް ރައީސް ވިދާޅުވިއެވެ.

ރައީސް ޑރ. މުޢިއްޒު ވިދާޅުވި ގޮތުގައި އެމަނިކުފާނު ވިސްނަވަނީ ރައްޔިތުން ވިސްނާ ގޮތަށެވެ. ރައްޔިތުން ބޭނުންވާ ކަންކަން ފަހިކުރެވޭނެ ގޮތްތައް ހޯދައިގެން އެގޮތަށް ކަންކަން ކުރައްވަން ބޭނުންފުޅުވާ ކަމަށް ވެސް އެމަނިކުފާނު ވިދާޅުވިއެވެ.