ނޮބްލް ކަލަޑޯނިއޯގެ ލަގްޒަރީ ކްރޫޒް ޝިޕް 'އެމްއެސް ހެބްރިޑިއަން ސްކައި' އިން ގާތްގަނޑަކަށް 100 ފަތުރުވެރިން މިއަދު ހެނދުނު އައްޑޫ ސިޓީއަށް ޒިޔާރަތްކޮށްފިއެވެ. މި ފަތުރުވެރިންގެ ތެރޭގައި ގިނައީ އިނގިރޭސިވިލާތުގެ ފަތުރުވެރިންނެވެ.
އުޅަނދު ބަނދަރުކުރީ މަރަދޫ ބަނދަރަށެވެ. ފަތުރުވެރިންނަށް މަރުހަބާ ކިޔުމަށް އައްޑޫ ސިޓީ ކައުންސިލާއި މަރަދޫ އަވަށު އޮފީހުގެ އިސްވެރިންނާއި އާންމު ރައްޔިތުން ވަނީ ބަނދަރު ސަރަހައްދަށް އެއްވެފައެވެ.
އައްޑޫ ސިޓީ ކައުންސިލްގެ މޭޔަރާއި ކައުންސިލް މެމްބަރުން ބައިވެރިވި ޚާއްޞަ ރަސްމިއްޔާތެއްގައި ދިވެހި ސަގާފަތް ދައްކުވައިދޭ ޙަރަކާތްތަކެއް ބޭއްވުނެވެ. މީގެ އިތުރުން، ސަގާފީ ތަކެތި ވެސް ފަތުރުވެރިންނަށް ދެއްކުން އޮތެވެ.
ރަސްމިއްޔާތަށްފަހު، އައްޑޫގެ އީކޯ ޓޫރިޒަމް އާއި މެރިން ކޮންޒަވޭޝަނަށް މަސައްކަތްކުރާ މަންޓާ އެކްސްޕެޑިޝަންސް ގްރޫޕުން ވަނީ ފަތުރުވެރިންނަށް އައްޑޫގެ ގުދުރަތީ ރީތިކަން ދައްކުވައިދޭ ޓުއަރެއް ހިންގާފައެވެ.
ފަތުރުވެރިން މިދަތުރުގައި އައްޑޫ ނޭޗަރ ޕާކަށާއި އައްޑޫގެ ތާރީޚު ދައްކުވައިދޭ 'ކޮށިދޮރަގެ އައްޑޫ ހެރިޓޭޖް ހައުސް' އަށް ޒިޔާރަތްކުރިއެވެ.
އެމްއެސް ހެބްރިޑިއަން ސްކައިއަކީ ކުޑަ ނަމަވެސް ޖާގައިގެ ގޮތުން ތަނަވަސް ކްރޫޒް ޝިޕެކެވެ. މިއީ މިފަދަ ކުދި ކްރޫޒް ޝިޕްތަކުގެ ތެރެއިން ދުނިޔޭގެ އެންމެ ފެންވަރު ރަނގަޅު އެއް އުޅަނދު ކަމުގައި ބެލެވެއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.