ރޯދަމަހަކީ ހަމައެކަނި ކެއުން ބުއިމަށް އަހައްމިއްޔަތުކަން ދޭ މަހަކަށް ނުހަދައި، އަޅުކަންތަކަށް ސަމާލުވާށެވެ!

ރޯދަމަހަކީ ހަމައެކަނި ކެއުން ބުއިމަށް އަހައްމިއްޔަތުކަން ދޭ މަހަކަށް ނުހަދައި، މި މާތް މަހުގައި އަޅުކަންތަކަށް އިތުރު ސަމާލުކަމެއް ދިނުމަށް އިސްލާމީ ކަންތައްތަކާ ބެހޭ ވުޒާރާގެ ސްޓޭޓް މިނިސްޓަރު އަލްއުސްތާޛު ޢަބްދުﷲ ސަޢުދާން ވިދާޅުވެއްޖެއެވެ.

އުސްތާޛު ސަޢުދާން މިހެން ވިދާޅުވީ "ނުރަނގަޅު އާދަތައް ދޫކުރުން" މި މަޢުޟޫއަށް ގދ. ގައްދޫގައި ރޭ ކުރިއަށް ގެންދިޔަ އިޙްޔާ ފޯރަމްގައި ތަޤުރީރު ކުރައްވަމުންނެވެ. މި ފޯރަމްގައި އިސްރާފުކުރުމާއި، ދޮގު ވާހަކަ ފެތުރުމާއި، މުދަލަށް ޚިޔާނާތްތެރިވުމުގެ ނުބައިކަމުގެ މައްޗަށް އަލިއަޅުވާލެއްވިއެވެ.

ސްޓޭޓް މިނިސްޓަރު ސަޢުދާން ވިދާޅުވީ އިސްރާފް ކުރުމަކީ މިއަދު ދުނިޔެއަށް ކުރިމަތިވެފައިވާ އިޖްތިމާއީ އަދި އިޤްތިސާދީ ބަލިމަޑުކަމެއް ތެރޭގައި ހިމެނޭ ކަމެއްކަމަށެވެ. އަހަރުގެ އާންމު މަސްތަކުގައި ކާބޯތަކެތި ތިން އިރަށް ތައްޔާރުކުރާވަރަށް ރޯދަމަހު ރޯދަ ވީއްލުމަށް އިސްރާފު ވާވަރަށް ކާބޯތަކެތި ތައްޔާރުކުރާކަމަށްވެސް އެމަނިކުފާނު ފާހަގަކުރެއްވިއެވެ.

މީގެ އިތުރުން، އެކި މުނާސަބުތަކާ ގުޅިގެން ފަރުނީޗަރު ފަދަ ތަކެތި އާކުރާއިރު، ބޭނުން ހިފޭ ތަކެތިވެސް އިސްރާފުވާގޮތަށް އުކާލާކަން ފާހަގަކުރައްވައި، ވީހާވެސް އިސްރާފު ކުޑަކުރުމަށް އަލްއުސްތާޛު ޢަބްދުﷲ ސަޢުދާން އެދިވަޑައިގެންނެވިއެވެ.

އިސްލާމީ ކަންތައްތަކާ ބެހޭ ވުޒާރާއިން މި ރަމަޟާން މަހު މާލޭގައި 8 އިޙްޔާ ފޯރަމް އަދި އަތޮޅުތެރޭގެ 7 ރަށެއްގައި އިޙްޔާ ފޯރަމް ބޭއްވުމަށް ވަނީ ނިންމާފައެވެ. އަތޮޅުތެރޭގެ އިޙްޔާ ފޯރަމްތައް އޮންނާނީ ގައްދޫގެ އިތުރުން ހދ. ނާވައިދޫ، ތ. ގުރައިދޫ، ފުވައްމުލަކު ސިޓީ، ހއ. ބާރަށް، ނ. މަނަދޫގެ އިތުރުން ރ. މީދޫގައެވެ.

މިއަހަރުވެސް އިޙްޔާ ފޯރަމްތަކަށް ވަޑައިގަންނަވާ ފަރާތްތަކުގެ ތެރެއިން ގުރުއަތުން ހޮވޭ ފަރާތްތަކަށް ހާއްސަ އިނާމުތަކެއް ދޭ ގޮތަށް ވަނީ ހަމަޖެހިފައެވެ.