ދުނިޔޭގެ އެކި ކަންކޮޅުތަކުގައި ރާއްޖެ ޕްރޮމޯޓް ކުރުމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން 4 މުހިންމު އެއްބަސްވުމެއްގައި ސޮއިކޮށްފިއެވެ.
މި އެއްބަސްވުންތަކުގައި ސޮއިކޮށްފައިވަނީ ދުބާއީ ވޯލްޑް ޓްރޭޑް ސެންޓަރުގައި ކުރިއަށްދާ މާރކެޓުގައެވެ.
އެމްއެމްޕީއާރްސީގެ މެނޭޖިން ޑިރެކްޓަރ އިބްރާހީމް ޝިއުރީ ސޮއިކުރެއްވި މި އެއްބަސްވުންތަކުގެ ރަސްމިއްޔާތުގައި ފަތުރުވެރިކަމާއި ތިމާވެއްޓާ ބެހޭ ވަޒީރު ތާރިޤް އިބްރާހީމް ބައިވެރިވެވަޑައިގެންނެވިއެވެ. މި އެއްބަސްވުންތަކުގެ ތެރޭގައި ހިމެނެނީ އެމިރޭޓްސް އެއަރލައިން، ޤަތަރު އެއަރވޭސް، ރިސޯޓް ލައިފް ކުންފުނި އަދި އިންޑިއާގެ ޓުއަރ އޮޕަރޭޓަރުންގެ ޖަމްޢިއްޔާއާއެކު ވެވުނު އެއްބަސްވުންތަކެވެ.
އެމިރޭޓްސް އެއަރލައިނާއެކު ވެވުނު އެއްބަސްވުމުގެ ދަށުން، އެ އެއަރލައިން ދަތުރުކުރާ ސަރަހައްދުތަކުގައި ރާއްޖެ ޕްރޮމޯޓްކޮށް، ރާއްޖޭގެ ވިޔަފާރިތައް ކުރިއެރުވުމަށް މަސައްކަތްކުރާނެއެވެ. ހަމައެއާއެކު، ޤަތަރު އެއަރވޭސްއާއެކު ވެވުނު އެއްބަސްވުމުގެ ދަށުން، ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް އަމާޒުކޮށްގެން މަސައްކަތްތަކެއް ކުރެވޭނެއެވެ.
ރަޝިއާ އަދި ސީއައިއެސް މާކެޓުގައި ރާއްޖޭގެ ފަތުރުވެރިކަން ޕްރޮމޯޓްކުރުމަށް ރިސޯޓް ލައިފް ކުންފުންޏާއެކު ވެވުނު އެއްބަސްވުމުގެ ދަށުން، އެ ސަރަހައްދުން އިތުރު ފަތުރުވެރިން ގެނައުމަށް މަސައްކަތްކުރެވޭނެއެވެ. އަދި އިންޑިއާގެ ޓުއަރ އޮޕަރޭޓަރުންގެ ޖަމްޢިއްޔާއާއެކު ވެވުނު އެއްބަސްވުމުގެ ދަށުން، އިންޑިއާއިން ރާއްޖެއަށް އަންނަ ފަތުރުވެރިންގެ އަދަދު އިތުރުކުރުމަށް މަސައްކަތްކުރެވޭނެއެވެ.
އެމްއެމްޕީއާރްސީން ފާހަގަކުރާ ގޮތުގައި މި އެއްބަސްވުންތަކާއެކު، ރާއްޖޭގެ ފަތުރުވެރިކަން ޕްރޮމޯޓުކުރުމަށް މިހާރު ކުރަމުންދާ މަސައްކަތްތައް އިތުރަށް ފުޅާވެގެންދާނެއެވެ.
ޚިޔާލު
އެންމެ ފުރަތަމަ ޚިޔާލު ދެއްވާ.